Në mungesë të akuzuarës Doruntina Dumani, ka dështuar të mbahet gjykimi ndaj ish-drejtorit të Inspektoratit në Komunën e Fushë Kosovës, Afrim Krasniqi dhe inspektorëve tjerë të ndërtimit, Valbona Ferati dhe Mobere Hyseni, i paraparë për të enjten në Gjykatën Themelore në Prishtinë.
Ferati, Dumani dhe Krasniqi po dyshohen se nuk i kishin ndërprerë punimet kundërligjore dhe nuk kishin nxjerrë vendim për rrënim, duke i mundësuar investitorit “Princesha Construction”, me pronar Shpend Bajraj të përfitoj nga këto ndërtime, i cili kishte pasur tejkalim të lejes ndërtimore, raporton “Betimi për Drejtësi”.
Avokatja Albana Kelmendi ka njoftuar se e akuzuara Dumani për shkaqe personale nuk ka mundur të jetë prezent në seancën e së enjtes.
Në këtë mënyrë, kjo seancë është shtyrë ndërsa ajo e radhës pritet të mbahet më 27 tetor 2021, në ora 13:00.
aktakuzës së ngritur me 14 dhjetor 2016, të akuzuarat Mobere Hyseni dhe Doruntina Dumani, në cilësinë e inspektoreve të ndërtimit, në Drejtorinë e Inspeksionit në Fushë Kosovë, përgjegjëse për rrugën “Shefki Kuleta” dhe “Nëna Terezë”, në Fushë Kosovë, nuk e kanë përmbushur detyrën e tyre zyrtare që kanë qenë të obliguara ta kryejnë në bazë të detyrave të tyre zyrtare.
Dumani dhe Hyseni, gjatë vizitës së punishtes më 30 maj 2014, kanë marrë pjesë në vendosjen e pikave të ndërtimit për ndërtimin e objektit numër l, sipas lejes ndërtimore të “Princesha Construstion”, dhe kanë bërë zhvendosjen e këtij objekti nga pikat e parapara sipas lejes dhe vijës ndërtimore të lëshuar nga Drejtoria për Planifikim Urban e Komunës së Fushë Kosovës.
Ndërsa, Valbona Ferati, Doruntina Dumani si inspektore të ndërtimit, dhe Afrim Krasniqi në cilësinë e drejtorit të departamentit të ndërtimit, gjatë periudhës kohore 2015-2016, nuk i kanë ndërprerë punimet kundërligjore dhe nuk kanë nxjerrë vendim për rrënim, duke i mundësuar në këtë mënyrë “Princesha Construction”, të përfitojë nga ndërtimet kundërligjore në dy objekte banesore tetë katëshe, i cili ka pasur tejkalimit të lejes ndërtimore.
Si rrjedhojë e kësaj, të akuzuarat Hyseni, Dumani dhe Ferati, i kishin mundësuar investitorit të vazhdojnë ndërtimin e objekteve me tejkalim të lejes, t’i përfundojnë ndërtimet dhe të pajisen me leje plotësuese, duke mos respektuar lejet ndërtimore, për të cilin tejkalim ka qenë në njohuri edhe i akuzuari Krasniqi, mirëpo i njëjti nuk ka ndërmarr asgjë për të parandaluar këtë ndërtim./ Media Ndërtimi.