Ish-sekretari i Ministrisë së Infrastrukturës (MI), Xhelil Bekteshi dhe zyrtari tjetër Besim Tahiri, sot janë shpallur fajtorë dhe janë dënuar me burgim nga ana e Gjykatës Themelore në Prishtinë për akuzën e keqpërdorimit të detyrës zyrtare, raporton Drejtësia Sot.
Bekteshi dhe Tahiri, këtë të premte, janë dënuar për akuzën e prokurorisë se gjatë vitit 2016 kishin keqpërdorur detyrën zyrtare me qëllim të dhënies së një tenderi për rrugë një kompanie që kishte ofertuar me çmim më të lartë.
Vendimi u komunikua nga kryetarja e trupit gjykues që gjykoi këtë çështje penale, gjyqtarja Fatime Dërmaku së bashku me prezencën e dy anëtarëve tjerë, gjyqtarëve Kushtrim Shyti dhe Agim Kuçi.
Gjyqtarja Dërmaku theksoi se të akuzuarit janë fajtorë për veprat penale që iu ngarkohen sipas aktakuzës, duke njoftuar se për këtë gjykata u shqipton secilit veç e veç dënim me burgim në kohëzgjatje prej tri viteve, i cili do ekzekutohet pasi aktgjykimi të merr formën e prerë.
Përveç kësaj, gjyqtarja tha se ndaj të akuzuarve shqiptohet dënimi plotësues i ndalimit të ushtrimit të funksioneve publike në administratën publike apo shërbimin publik, në kohëzgjatje prej 2 vitesh pas mbajtjes së dënimit me burgim.
Gjithashtu, gjyqtarja njoftoi se të akuzuarit në mënyrë solidare obligohen që të kompenzojnë dëmin të cilin ia kanë shkaktuar MI-së në vlerë prej më shumë se 29 mijë euro.
Ndërsa në fund të shpalljes së aktgykimit, para se të potencojë këshillën juridike, gjyqtarja tha se të akuzuarin obligohen që të paguajnë nga 50 euro në emër të fondit për kompenzimin e viktimave si dhe 200 euro në emër të paushallit gjyqësor.
Ndryshe, sipas aktakuzës së ngritur nga prokurori Ibrahim Berisha, Xhelil Bekteshi dhe Besim Tahiri kishin kryer veprën penale “keqpërdorim i pozitës apo autoritetit zyrtar”, kurse Naim Sallahu akuzohet se ka kryer veprën penale “falsifikim i dokumentit”.
Ndryshe, sipas aktakuzës së ngritur nga prokurori Ibrahim Berisha, Xhelil Bekteshi dhe Besim Tahiri kishin kryer veprën penale “keqpërdorim i pozitës apo autoritetit zyrtar”, kurse Naim Sallahu akuzohet se ka kryer veprën penale “falsifikim i dokumentit”.
Në këtë akt akuzues thuhet se Xhelil Bekteshi kishte obliguar zyrtaren V.R, që në librin e protokollit të regjistronte vendimin me të cilin ishte ndërruar kryetarja e komisionit për vlerësimin e ofertave për projektin “Zgjerimi i Rrugës Nacionale N-9” segmenti Gjuregjicë-Kjevë, duke regjistruar vendimin me datën 23.05.2016 në vend të datës së vërtetë 26.06.2016. Sipas aktakuzës ky ndryshim i datave ishte bërë me qëllim që tenderi t’i jepej operatorit ekonomik N.N.T “Sallahu” i cili ishte me çmim të lartë 991,418.19 euro, ndërsa operatorit tjetër ekonomik i cili kishte ofruar çmim më të ulët se ky operator ishte eliminuar./Media Ndërtimi.