Për shkak të mungesës së prokurorit, këtë të mërkurë, ka dështuar të mbahet gjykimi në rastin ku dy zyrtarët e Ministrisë së Infrastrukturës (MI), Xhelil Bekteshi dhe Besim Tahiri po akuzohen për keqpërdorim të detyrës zyrtare, raporton Drejtësia Sot.
Bekteshi dhe Tahiri po gjykohen në Departamentin për Krime të Rënda të Gjykatës së Prishtinës, nën akuzën se kishin keqpërdorur detyrën zyrtare me qëllim të dhënies së një tenderi për rrugë një kompanie që kishte ofertuar me çmim më të lartë.
Me të filluar shqyrtimi gjyqësor, kryetarja e trupit gjykues, gjyqtarja Fatime Dërmaku theksoi se ka pranuar një kërkesë nga ana e prokurorit Ibrahim Berisha që kjo seancë të shtyhet për çështje shëndetësore.
Prandaj si rezultat i mungesës së kushteve ligjore kjo seancë është shtyrë, ndërsa ajo e radhës është caktuar më datë 3 gusht 2021, me fillim nga ora 09:30.
Ndryshe, sipas aktakuzës së ngritur nga prokurori Ibrahim Berisha, Xhelil Bekteshi dhe Besim Tahiri kishin kryer veprën penale “keqpërdorim i pozitës apo autoritetit zyrtar”, kurse Naim Sallahu akuzohet se ka kryer veprën penale “falsifikim i dokumentit”.
Në këtë akt akuzues thuhet se Xhelil Bekteshi kishte obliguar zyrtaren V.R, që në librin e protokollit të regjistronte vendimin me të cilin ishte ndërruar kryetarja e komisionit për vlerësimin e ofertave për projektin “Zgjerimi i Rrugës Nacionale N-9” segmenti Gjuregjicë-Kjevë, duke regjistruar vendimin me datën 23.05.2016 në vend të datës së vërtetë 26.06.2016. Sipas aktakuzës ky ndryshim i datave ishte bërë me qëllim që tenderi t’i jepej operatorit ekonomik N.N.T “Sallahu” i cili ishte me çmim të lartë 991,418.19 euro, ndërsa operatorit tjetër ekonomik i cili kishte ofruar çmim më të ulët se ky operator ishte eliminuar.
I pandehuri Besim Tahiri, akuzohet se në cilësinë e ushtruesit të detyrës së Drejtorit në Divizionin e Prokurimit në MI, kishte tejkaluar kompetencat e tij duke ushtruar ndikim te kryetarja e komisionit E.A që e njëjta ta ndërrojë raportin për vlerësimin e tenderit./Media Ndërtimi.