Mungesa e pajisjeve kundër zjarrit në banesat kolektive të Prishtinës po vazhdon të jetë çështje shqetësuese për mijëra banorë që tashmë kanë vendosur të jetojnë në komplekse banesore.
Në kushte anonimiteti shumë banorë i kanë thënë Media Ndërtimit se në korridoret e apartamenteve ku ata jetojnë mungojnë bombolat si dhe instalimi të cilat mundësojnë intervenimin e shpejtë nga shpërthimi i zjarrit.
Madje sipas tyre, përpos kësaj në shumicën e ndërtesave janë improvizuar daljet emergjente dhe ndërtuar pa kritere.
Shenjat që iu tregojnë banorëve për shpëtimin e tyre nga shpërthimi i zjarrit ose tërmeteve janë mungesat shtesë të këtyre ndërtesave.
Mekanizmat shtetërorë duket të jenë dorëzuar në këtë problematikë shoqërore, pasi që ndaj investitorëve të objekteve asnjëherë nga inspektorët nuk u është shqiptuar gjoba për mungesën e pajisjeve kundër zjarrit.
Madje shteti del se nuk i ka obliguar investitorët që ta bëjnë së paku sigurinë minimale për banorët nga shpërthimi i mundshëm i zjarreve.
Ministria e Punëve të Brendshme ka lëshuar këtyre ditëve një komunikatë ku vetëm apelohet për kujdes nga kanosjet e zjarrit.
“Me qëllim të evitimit të rrezikut nga zjarri, mbrojtjes të jetës së qytetarëve, të pronës, shtazëve dhe ambientit, APELOJMË që të jemi të gjithë të kujdesshëm dhe vigjilent për shmangien e të gjithë shkaktarëve të mundshëm të zjarrit, vërejtjen dhe lajmërimin me kohë si dhe të ndihmojmë në shuarjen e zjarrit ne fazën e parë të shfaqjes, ku do që ai mund te paraqitet. Reagimi ne rreziqe dhe kërcënime është detyrë dhe obligim qytetarë i secilit nga ne!”, shkruan në këtë komunikatë të MPB-së.
Media Ndërtimi ka provuar që ta marr një opinion nga eksperti i çështjes së sigurisë kundër zjarreve, Nazmi Bajrami, por që ai ka refuzuar të jap sqarime me arsyetimin se është i zënë me punë.
Kur ekspertët heshtin dhe shmangën nga informimi se kujt i takon përgjegjësia që banorët e banesave kolektive në Prishtinë duhet të kenë në korridore pajisjet e mbrojtjes kundër zjarrit, atëherë të njëjtin veprim e kanë bërë edhe institucionet që e kanë për detyrë ta zgjidhin këtë problem, duke mos u përgjigjur për këtë shqetësim./Media Ndërtimi.