Deputetja e Kuvendit të Kosovës dhe ish-kryetarja e Komunës së Gjakovës, Mimoza Kusari-Lila, ka reaguar ndaj publikimit të emrave të protestuesve nga Aleanca për Ardhmërinë e Kosovës, parti kjo e cila është në pozitë në Gjakovë.

AAK gjatë ditës së sotme i ka publikuar emrat e disa prej protestuesve të cilët u ngritën kundër zgjerimit të rrugës “Nënë Tereza”  cila gjendet në qendër të Gjakovës. Nga kjo parti protestën e qytetarëve e kanë cilësuar si të motivuar nga opozita në këtë komunë.

“Sa i përket disa zërave kundër këtij projekti, kryetari Gjini ka thënë se këto pakënaqësi janë të motivuara nga subjektet politike të opozitës, të cilat në secilin projekt të komunës tentojnë të krijojnë situata të tilla të ndikuara politikisht, duke iniciuar peticione apo tubime pakënaqësie, që e cila sjellë vetëm pengesë për zhvillimin e komunës së Gjakovës” ka thënë Komuna përmes një njoftimi.

Kurse më vonë partia e Ardian Gjinit, kryetarit të Gjakovës, i ka publikuar edhe emrat e disa prej qytetarëve pjesëmarrës në protestë, në mesin e të cilëve kishte edhe asambleistë nga radhët e Vetëvendosjes dhe Alternativës.

Për publikimin e këtyre emrave ish-kryetarja e Gjakovës, Kusari-Lila, ka thënë se është metodë e ulët dhe primitive.

“Listimi i “kundërshtarëve” publikisht, është metodë e njohur për të gjithë ne që e mbajmë mend sistemin represiv të Serbisë në Kosovë. Kjo është metodë e agresorëve për të frikësuar të lartëpërmendurit dhe për t’i paralajmëruar të tjerët nëse vendosin të ju bashkohen”, ka thënë Kusari-Lila në një postim në Facebook.

Ajo më tej ka shtuar se degradimi i Gjakovës nuk është e drejtë e garantuar me votë.

“Përdorimi i argumentit të forcës në vend të forcës së argumetit sjellë dhunë dhe synon diktatin.
E Gjakova kurrë nuk i është nënshtru diktatit, aq më pak kur liria e shprehjes është paguar shtrenjtë”, ka shtuar ish-kryetarja.

Postimi i plotë i Mimoza Kusari-Lila:

“Nëse nuk besojmë në shprehjen e mendimit të lirë të atyre me të cilët nuk pajtohemi, ne nuk besojmë në liri”.

AAK – dega në Gjakovë, si parti në pushtetin lokal paska vendos me i shënu publikisht emrat e disa prej protestuesve të sotëm të cilët zgjodhën metodën demokratike të garantuar me ligj dhe kushtetutë, atë të protestës, për të shprehë kundërshtinë e tyre me nisjen e punimeve pa projekt e pa vizion nga Kryetari i komunës së Gjakovës. Shto kësaj edhe degradimin mjedisor dhe cenimin e lirisë së lëvizjes që ky zgjerim i rrugës automobilistike sjellë në zemër të qytetit.

Listimi i “kundërshtarëve” publikisht, është metodë e njohur për të gjithë ne që e mbajmë mend sistemin represiv të Serbisë në Kosovë. Kjo është metodë e agresorëve për të frikësuar të lartëpërmendurit dhe për t’i paralajmëruar të tjerët nëse vendosin të ju bashkohen.

E ultë dhe primitive kjo metodë. Dega e AAK – së në Gjakovë është dashtë ta kuptojë shumë më parë se frikësimi apo shantazhimi i kundërshtarëve të tyre as nuk pin ujë dhe as nuk jep efekt. Ndërsa, degradimi i Gjakovës nuk është e drejtë e garantuar me votë, por e kundërta e saj.
Përdorimi i argumentit të forcës në vend të forcës së argumetit sjellë dhunë dhe synon diktatin.
E Gjakova kurrë nuk i është nënshtru diktatit, aq më pak kur liria e shprehjes është paguar shtrenjtë.

#GjakovaNukNënshtrohet