Pas shikimit të Planit Rregullues të propozuar për Zonën rreth Fakultetit Teknik do të shpreh mendimin tim si arkitekt dhe banor i lagjes Mati 1.
Këndvështrimi im drejtohet te koncept plani i propozuar që ndikon te hapësirat e gjelbëruar në juglindje nga ndërtesa e Fakultetit Teknik dhe jo te specifikat tjera dhe dytësore të tij.
Plani i propozuar ka së paku një problem jo të vogël (por shumë lehtë i zgjidhshëm, sepse është afërsisht vetëm çerek pjesë e sipërfaqes në Planin e plotë të propozuar).
Ky plan siç është ideuar përkeqëson hapësirën ekzistuese të gjelbëruar që tash sa vite përdoret për relaksimin dhe pushimin e aktivitetet fizike të banorëve të lagjes Mati 1, Bregu i Diellit dhe Ulpianës.
Në këtë dokument hapësinor përmendet se gjatë punimit të planit të fizibilitetit janë konsultuar edhe grupet e interesit, por nuk përmenden se cilat grupe ishin ato që ishin prezentë në ato takime?
E kuptoj nevojën për rritjen e hapësirave të Universitetit të Prishtinës, por ky lloj ndërtimi/investimi publik) duhet te jetë patjetër në harmoni me interesin publik.
Interesi publik në këtë rast përveç zhvillimit të Arsimit publik është edhe ruajtja e hapësirës shumë të pakët cilësore të banorëve të rrethinës ku po planifikohet të ndërtohet.
Të gjithë banorët e Prishtinës e dinë shumë mirë se aty në lindje dhe në jug të ndërtesës së Fakultetit Teknik ka një hapësirë të gjelbëruar që përdoret shumë dhe përditë nga banorët e lagjeve përreth.
Në këtë plan u përmenden edhe Planet e vjetra. Në kohën e tashmë pothuajse nuk janë fare me rëndësi idetë e vitit 1975 për planifikimin e zonës në fjalë, e sidomos kur dimë se prej pasluftës pothuajse asgjë nuk është planifikuar duke u bazuar në planet e kohës së paraluftës 1999.
Çdo moment kohor i ka rrethanat e veta reale, kështu që hapësira e cila po shfrytëzohet nga banorët e rrethinës ka kohë që ka krijuar identitetit e vet si hapësirë publike për pusheshim, e aktivitetet sportiv.
Në planifikim dhe dizajn urban mësojmë dhe udhëzohet që hapësirat publike që krijojnë identitet nga lëvizjet spontane të qytetarëve nuk ka nevojë të definohen fare nga arkitektët dhe urbanistët, sepse natyralisht ato kanë gjetur mënyrën e funksionimit më të mirë.
Kjo hapësirë mund të përmirësohet me gjelbërim të lartë për hije, por jo me ndërtim të ri.
Prandaj, si përfundim mendoj se ky Plan rregullues nuk përmban asnjë arsyetim të mirëfilltë apo planifikim racional/logjik për sipërfaqen ku propozon zhdukjen e identitetit ekzistues të hapësirës së cekur.
Ky Plan propozon që mbi më shumë se gjysmën e hapësirës së gjelbëruar në fjalë të ndërtohet me një godinë 7 katesh, e cila e përkeqëson përfundimisht dhe plotësisht këtë hapësirë pushimi.
Këtu nuk ka nevojë fare për riorganizim apo zvogëlim të sipërfaqes së gjelbërimit,
*Ky opinion është shkruar nga arkitekti BUJAR PRESTRESHI, i cili ka reaguar ndaj Planit rregullues të hollësishëm për “Zonën e Fakultetit Teknik, në lagjen Bregu i diellit në Prishtinë./ Media Ndërtimi.