Vetëtima djeg shkollën në Nishor të Suharekës

0

Shkolla e vjetër e fshatit Nishor të Suharekës ka marrë flake si pasojë e vetëtimës, nga moti i keq që ka kapluar këtë fshat natën e mbrëmshme. Lidhur me këtë ngjarje për Ndërtimin.info ka folur zëdhënësi i Komunës së Suharekës Reshat Reshitaj.

“Shkolla e vjetër e fshatit ka marrë flakë si pasojë e vetëtimës. Shkaktari pra janë kushtet atmosferike dhe ora e rrymës ku si pasojë e saj ka marrë flakë edhe shkolla”, ka thënë Reshitaj.

Fatmirësisht, nuk ka pasur të lënduar e as pasoja të tjera materiale. Shkolla nuk dyshohet që të jetë djegur qëllimisht, këtë e potencon edhe zëdhënësi i Komunës, raporton Ndertimi.info.

Pas ndërtimit të shkollës së re, shkolla e vjetër në Nishor planifikohet të rrënohet.

“Shpresoj të rrënohet sa më shpejt, biles para shtatorit pasi aty duhet t’i lëshohet vendi një poligoni sportiv”, ka shtuar më tutje Reshitaj.

Shi i furishëm si dhe vetëtima e kanë përcjellë fshatin Nishor gjatë tërë natës së mbrëmshme. E si rezultat i këtyre kushteve atmosferike vendi ka mbetur edhe pa energji elektrike. /Ndertimi.info/

 

 

PËRGJIGJU

Please enter your comment!
Please enter your name here