Komisioni Europian hartoi një plan që lejon shitjen e automjeteve të reja me motor me djegie të brendshme që funksionojnë vetëm me e-karburante neutrale për klimën, në një përpjekje për të zgjidhur mosmarrëveshjen me Gjermaninë, mbi eliminimin gradual të makinave me motor me djegie të brendshme në vitin 2035.

Projekt-propozimi, i parë të martën nga Reuters, synon të krijojë një lloj të ri të kategorisë së automjeteve në Bashkimin Europian për makina që mund të funksionojnë vetëm me karburante me emetime zero.

Automjete të tilla, sipas planit, duhet të përdorin një teknologji që i pengon të qarkullojnë nëse përdoren karburante të tjera.

Kjo do të përfshinte “një sistem nxitës të karburantit” për të ndaluar ndezjen e makinës nëse ajo përdor karburante joneutrale në lidhje me emetimet e karbonit.

Propozimi mund t’u ofrojë prodhuesve të automjeteve një mënyrë për të vijuar shitjen e makinave me motor me djegie të brendshme pas vitit 2035, kur hyn në fuqi ligji i BE-së i cili ndalon shitjen e makinave të reja që emetojnë CO2.

Pas disa muajsh bisedime, vitin e kaluar vendet e BE-së dhe Parlamenti Europian miratuan ligjin.

Por këtë muaj, Ministria gjermane e Transporteve befasoi vendet e tjera, duke paraqitur disa kundërshtime ndaj ligjit në minutën e fundit, disa ditë para votimit përfundimtar, që do ta kishte parë të hynte në fuqi.

Kërkesa kryesore e Ministrisë është që BE të lejojë shitjen e automjeteve të reja me e-karburante pas vitit 2035. Ministria nuk ishte e gatshme për të dhënë një koment.

Të hënën, Ministria deklaroi që bisedimet me Komisionin mbi përfundimin e planifikuar të motorëve të rinj me djegie duke nisur nga viti 2035 po ecnin përpara, por shtoi se nuk mund të thoshte se kur do të arrihej një marrëveshje./Media Ndërtimi

Mercedes do të investojë miliarda euro për të modernizuar fabrikat e saj në Kinë, Gjermani dhe Hungari gjatë viteve të ardhshme, raportoi revista Automobilwoche, teksa prodhuesi i makinave përgatitet të kalojë në automjete elektrike dhe të reduktojë emetimet.

Bashkimi Evropian ka vendosur një objektiv për të përgjysmuar emetimet e CO2 për makinë pasagjerësh gjatë ciklit të tyre jetësor deri në fund të kësaj dekade krahasuar me vitin 2020 dhe po kërkon marrëveshje për një afat kohor të vitit 2035 për t’i dhënë fund shitjes së veturave me lëndë djegëse fosile.

Mercedes ka thënë se do të jetë gati të prodhojë vetëm vetura elektrike deri në fund të kësaj dekade, aty ku lejojnë kushtet e tregut, raporton Reuters

“Ne po investojmë një shumë milionëshe për fabrikë sa për fillim”, citohet të ketë thënë menaxheri i prodhimit Joerg Burzer, duke shtuar se këto investime do të jenë në fabrikat në Pekin të Kinës, Rastatt të Gjermanisë dhe Kecskemet të Hungarisë.

Prodhuesi i veturave do të fillojë punën në fabrikën Rastatt gjatë muajve të ardhshëm dhe do të prodhojë modelin e parë të platformës kompakte të veturave MMA nga viti 2024. Numri i modeleve të prodhuara atje nga shtatë do të ulet në katër, deklaroi Burzer.

Përveç kësaj, Mercedes do të investojë disa miliardë euro në modernizimin e sistemeve të lyerjes në fabrikat e saj Sindelfingen, Bremen dhe Rastatt në Gjermani.

Raporti tha se modernizimi synon të reduktojë konsumin e energjisë dhe ujit, dhe mbështetjen e sistemit të lyerjes në gaz, kjo duke iu përshtatur energjisë pa karbon./Media Ndërtimi

Një projektues italian ka ri-imagjinuar të ardhmen e automjeteve fluturuese me mjetin e tij konceptual fluturues 4×4.

Krijuar nga Pierpaolo Lazzarini në studiot e tij të dizajnit, Aircar nuk do të dukej i pavend në serinë e fundit të Star Wars, transmeton Telegrafi.

Aircar mundësohet nga motorët e aeroplanëve Rolls-Royce që i mundësojnë të fluturojë nëpër qiell me shpejtësi mbresëlënëse.

Duke i lejuar udhëtarët të shmangin trafikun rrugor të ngarkuar thjesht duke fluturuar mbi tokë, aeroplani reaktiv 4×4 është gjashtë metra i gjatë dhe është projektuar për të bartur një pilot dhe tre pasagjerë.

Automjeti i përbërë nga fibra karboni do të thotë se është ultra i lehtë, derisa ata motorë aeroplanësh Rolls-Royce mund të rrotullohen në drejtime të ndryshme në varësi të mënyrës që dëshironi të shkoni – duke ndihmuar me stabilitetin dhe manovrimin e përgjithshëm.

I mundësuar nga karburanti i aeroplanit, Aircar mund të lëvizë me një shpejtësi maksimale të vlerësuar prej 750 kilometra në orë me një distancë prej 3,200 kilometrash.

Ajo që është më e veçanta me këtë automjet është se, për shkak të sistemit të tij të motorit 4×4, ai mund të kthehet dhe të lëvizë shpejt në lartësi dhe shpejtësi të ndryshme.

Për momentin Aircar mbetet vetëm një koncept automjeti fluturues, ndonëse krijuesi po synon ta lansojë prototipin në vitin 2024./Media Ndërtimi