Connect with us

Aktuale

Plani i (pa)mundur për ndërtimet nga dy kandidatët për kryetar të Prishtinës

Published

on

Në Kosovë nga data 8 nëntor fillon fushata pesëditore për raundin e dytë të zgjedhjeve, të cilat do të përcaktojnë kryetarët e ri në 21 komuna.

Sipas Ligjit për Zgjedhjet Lokale, rundi i dytë i zgjedhjeve ndërmjet dy kandidatëve, të cilët kanë fituar më së shumti vota të vlefshme, mbahet më 14 nëntor.

Arben Vitia nga Lëvizja Vetëvendosje! dhe Përparim Rama nga Lidhja Demokratike e Kosovës, janë dy kandidatët që po përballën në garën e balotazhit për ta udhëhequr Prishtinën gjatë katër viteve të ardhshme.

Në vazhdim janë disa nga pikat kryesore të dy kandidatëve për ndërtimet që planifikohet të realizohen  në mandatin e tyre.

Programi i ARBEN VITISË, për ndërtimet në Prishtinë

Shumë lagje në Prishtinë janë krejt të izoluara dhe të shkëputura nga qendra e qytetit. Përmes ndërhyrjeve në infrastrukturën rrugore, e përmes platformave mbikaluese multifunksionale do të integrojmë lagjet mes vete në mënyrë organike dhe t’i japim jetë të re jetës brenda lagjeve dhe bashkë me lagjet tjera.

Në këtë mënyrë do lidhet Arbëria me qendrën dhe Kalabria me Dardaninë.

Projektet për platformat ndërlidhëse do të bëhen me konkurse të hapura brenda vitit 2022, kurse ndërtimi do të përfundojë deri në vitin 2024.

Këto platforma me një sipërfaqe të përbashkët prej 12,000 metrave katror, do të integrojnë qytetin përmes 5 pikave strategjike, dhe do të kenë gjelbërim dhe hapësira relaksimi.

Do të ndahen 12 milionë euro për këtë projekt.

Do të implementohen linjat e reja të transpor[1]tit publik sipas planit të mobilitetit.

Të gjitha lagjet dhe fshatrat e Prishtinës do të integrohen plotësisht përmes transportit publik modern dhe në shërbim të qytetarëve.

Brenda mandatit të arrihet një rrjet i gjerë me autobusë të mjaftueshëm për transport të operuar nga Trafiku Urban dhe operatorët tjerë, të cilët do të integrohen brenda Trafikut Urban. Do të ketë intervenime në restaurime, fasadime dhe ndërhyrje tjera estetike në banesat kolektive sidomos në lagjet Dardania, Ulpiana, Bregu i Diellit, Qendra dhe Qafa. Do të ketë rigjenerim, rivatilizim ekonomik dhe estetik edhe në rrugën Ilir Konushevci nga ndërtesa e Komunës te Xhamia e Llapit.

Do të ndahen 2 milionë EURO për projektin e fasadimeve.

Do të ndërtohen edhe 4 parkingje të reja me gjithsej 2.600 hapësira parkimi, sipas planit të mobilitetit, në hyrjet e qytetit në lagjen Arbëria, Prishtina e Re, Kodra e Trimave dhe Medrese.

Do të investohen 1 milion EUR për parkingjet e reja, kurse ndërtimi i tyre do të fillojë në fillim të vitit 2023.

Nuk do të mbetet asnjë rrugë a hapësirë publike në Komunën e Prishtinës pa ndriçim. Dhe ato do të mirëmbahen vazhdimisht.

Do të funksionalizohet policia e qytetit sa më parë që përveç të tjerash të ecim Prishtinës edhe të sigurt.

 

Programi i PËRPARIM RAMËS për ndërtimet në Prishtinë

Ndërtojmë vendparkime të mëdha në 6 pikat kryesore rreth unazës së brendshme të Prishtinës, ku distanca do të jetë rreth 500 metra nga secila pikë e qendrës;

Ndërtojmë 430 vend-parkime të reja në lagjen Ulpiana, në formë të dis-nivelit, duke ruajtur gjelbërimin lartë tij;

Ndërtojmë hapësira parkimi përmes unazës së brendshme të zonës qendër, e cila ka një gjatësi 4650m, dhe përbëhet nga rrugët Agim Ramadani (1500 m), Bulevardi Bill Klinton (950 m), Rruga Tirana (1400 m), dhe rruga e UÇK-së (800 m). Përfundojmë parkingun nëntokësor tek AKP-ja, duke e zhvendosur tregun e gjelbër mbi sipërfaqen e parkingut dhe atë ekzistues tek tregu i gjelbër;

Krijojmë zonimin e vendeve të parkimit, me lagje, ku qytetarët aplikojnë për leje vjetore për parkim në lagje; Ndërtojmë parkingun nëntokësor te Posta Qendrore, duke e ruajtur gjelbërimin lart. Rrethi i flamurit Mbikalimet dhe nënkalimet në Prishtinë Lagjen Arbëria do ta lidhim me Qendrën nëpërmjet platformës së gjelbër në vazhdimësi të Pallatit të Rinisë, përmbi rrugën e rrethit të brendshëm. Po ashtu do ta lidhim edhe Pallatin e Rinisë me Hotelin Grand.

Në të njëjtën frymë do të krijohen hapësira urbane që ndërlidhin dy lagjet e mëdha të qytetit, Dardania dhe Kalabria, nëpërmjet nënkalimit nga rrethi i Veternikut e deri te Stacioni i Autobusëve. Aty do të krijohen parkingje nëntokësore, si dhe hapësira komerciale që mundësojnë realizimin e këtij projekti, i zbatuar si projekt investimi publiko-privat.

Ne do të: Ndërtojmë nënkalimin për vetura në rrugën nga hyrja e Veternikut në drejtim të Stacionit të Autobusëve në koordinim me Ministrinë e Infrastrukturës, duke mundësuar lidhjen e lagjes Kalabria me Dardaninë me bulevard mbi të. Po ashtu, si pjesë e këtij projekti do të jetë parkingu nëntokësor në lagjen Dardania; Ndërtojmë mbikalimin tek shkallët e Arbërisë; Ndërtojmë mbikalim tek stacioni i trenit, i cili lidhet me Pallatin e Rinisë;

Ndërtojmë nënkalimin që lidhë “Rrethin e Flamurit” me “Rrethin e QKUK-së” i cili do të ketë të integruar edhe një parking nëntokësor te hyrja e Qytetit në zonën në mes tre rrathëve; Ndërtojmë nënkalimin për vetura në rrugën Agim Ramadani, i cili do të mundësonte shkarkimin e trafikut dhe lidhjen organike më të mirë të zonës së vjetër të qytetit me qendrën; Inicojmë projektin e nënkalimit për vetura në pjesën nga Katedralja në drejtim të Fakultetit Filologjik, duke lehtësuar komunikacionin mbi rrugën ekzistuese.

Realizojmë projektin Rruga A dhe vazhdimin e Rrugës B në të dy drejtimet, të cilat do të lirojnë trafikun në “Prishtinën e Re”, përkatësisht lagjet: Bregu i Diellit, Mati, dhe Zllatari. Krahas ndërtimit të Rrugës A dhe vazhdimit të rrugës B, do të ndërtojmë kolektorin atmosferik, kanalizimin fekal, rrjetin e ujësjellësit, infrastrukturën elektrike dhe telekomunikuese;

Ndërtojmë rrugën Veternik-Hajvali, e cila do të shërbej si një arterie që do të lidhë lagjet me pjesën e re të Prishtinës dhe gjithashtu do të lidhë Gollakun me Anamoravën;

Ndërtojmë rrugën “Bajram Bahtiri” në Llukar, e cila do të shërbejë si arterie që e lidhë Prishtinën me Gollakun, ku ndodhen bukuri të shumta natyrore të Komunës së Prishtinës. Kjo rrugë, e cila do të jetë me katër korsi, do të mundësojë një qasje më të lehtë për lidhjen e fshatrave të Gollakut me Prishtinën; Nga Fusha e Pajtimit, në drejtim të fshatërave Makovc, Llukar dhe Grashticë.

Do të trajtohet lumi në të gjithë gjatësinë e tij. Do të trajtohet gjithashtu rrjeti i Kanalizimit, Ujësjellësit, Shëtitorja përbri, dhe kolektori atmosferik, duke ruajtur përrockën.

Ndërtojmë rrugën nga Gjimnazi “Sami Frashëri” në drejtim të tregut të gjelbër, e cila do të mundësojë konservimin e Qytetit të Vjetër dhe do të krijojë shëtitoren e lirë nga qendra drejt Qytetit të Vjetër. Krahas ndërtimit të rrugës, ky projekt do të përfshijë kolektorin atmosferik, kanalizimin fekal, rrjetin e ujësjellësit, infrastrukturën elektrike dhe telekomunikuese; Intervenojmë në ndarjen e rrjetit të kanalizimit fekal dhe atmosferik.

Qyteti i Prishtinës ka konfiguracion fantastik të terenit, për zgjidhjen e këtij problemi një herë e mirë; Zgjidhim problemin e kanalizimit në të gjitha fshatrat e Prishtinës, gjatë dy viteve të para; Përfundojmë urgjentisht rrugën mbi kolektorin atmosferik në lagjen Kalabria, në mënyrë që qytetarët e kësaj pjese të kenë lidhje të denjë rrugore me pjesën qendrore të qytetit;

Ndërtojmë kanalizimin fekal dhe atmosferik në Hajvali (Prishtina e Re), i cili do të zgjidhë një problem kronik për “Prishtinën e Re”, më saktësisht për zonën që fillon nga Pallati i Drejtësisë dhe e përfshinë pjesën dërrmuese të Hajvalisë./Media Ndërtimi.

 

Aktuale

Punëtorëve të ndërtimtarisë në Zvicër u rritet paga për 150 franga

Published

on

Si rezultat i negociatave, duke filluar nga 1 janari 2023, paga aktuale do të rritet me 150 franga dhe paga minimale me 100 franga

Punëtorët e ndërtimit në Zvicër do të kenë rritje të pagave prej 150 CHF, duke filluar nga viti i ardhshëm, transmeton albinfo.ch.

Shefat e ndërmarrjeve të ndërtimit dhe sindikatat kanë gjetur zgjidhjen në mosmarrëveshjen e mprehtë të punës, e cila po përshkallëzon, bëjnë të ditur shoqatat dhe sindikatat e mjeshtërve të ndërtimit.

Delegacionet negociuese të Shoqatës së Ndërtuesve të Zvicrës SBV dhe sindikatat Unia dhe Syna kanë rënë dakord të martën mbrëma për një rezultat, pas negociatave intensive, shkruan srf.ch. Pjesë e rezultatit janë thjeshtimet në organizimin e orarit të punës dhe përmirësimet që rrisin atraktivitetin e sektorit të ndërtimit.

Kështu, si rezultat i negociatave, duke filluar nga 1 janari 2023, paga aktuale do të rritet me 150 franga dhe paga minimale me 100 franga, përcjell albinfo.ch. Kontrata e re në nivel vendi, lidhet për tre vjet.

Rezultati i negociatave ende duhet të miratohet nga organet vendimmarrëse të të dyja palëve./Media Ndërtimi

Continue Reading

Aktuale

Shkencëtarët zviceranë krijojnë dritaret që prodhojnë energji elektrike

Published

on

E gjithë drita natyrore që hyn përmes dritareve, mund të vijë dita që të vlejë shumë më tepër sesa thjeshtë për ndriçim. Shkencëtarët në Zvicër kanë arritur një rekord të ri të efikasitetit për qelizat transparente diellore, duke i hapur rrugën krijimit të dritareve që prodhojnë energji elektrike, të cilat mund të ndihmojnë në furnizimin me energji të shtëpive dhe pajisjeve tona.

Të njohura gjithashtu si qelizat Grätzel, qelizat diellore të ndjeshme ndaj ngjyrave (DSC) janë një lloj qelizash fotovoltaike me kosto të ulët, të cilat përdorin një ngjyrues të fotosensitiv të integruar në sipërfaqen e një gjysmëpërçuesi për të kthyer dritën e dukshme në energji.

Versionet e mëparshme të DSC-ve mbështeteshin kryesisht në rrezet direkte të diellit, por shkencëtarët në École Polytechnique Fédérale de Lausanne (EPFL) kanë gjetur një mënyrë për të bërë foto-sensitizues transparentë, të cilat janë molekula që mund të aktivizohen nga drita dhe që mund të “absorbojnë” dritën në të gjithë spektrin e dukshëm.

“Gjetjet tona hapin rrugën për ta bërë më të thjeshtë aksesin e DSC-ve me parametra të lartë dhe ofrojnë perspektiva premtuese për zbatimin e tyre në praktikë, duke siguruar furnizim me energji elektrike dhe duke zëvendësuar bateritë për pajisjet elektronike me konsum të ulët, të cilat përdorin dritën e mjedisit si burim energjie,” shkruajnë autorët e studimit të botuar në revistën shkencore Nature.

DSC-të janë transparente, elastikë dhe mund të prodhohen në një gamë të gjerë ngjyrash me një kosto relativisht të ulët. Këto panele diellore të tejdukshme janë duke u përdorur në xhamat e sipërm të ndërtesave, në serra dhe në fasadat prej xhami.

Në vitin 2012, Qendra e Konventave SwissTech zbatoi për herë të parë teknologjinë DSC në një ndërtesë publike. Në vitin 2017, Shkolla Ndërkombëtare e Kopenhagës përuroi ndërtesën e saj të re me afërsisht 12,000 panele diellore transparente me nuanca blu, të cilat përdorin të njëjtën teknologji DSC.

Ato ofrojnë rreth 300 megavat orë (MWh) të energjisë elektrike në vit, duke plotësuar më tepër se gjysmën e nevojave vjetore të shkollës për energji.

Pavarësisht faktit se dritaret që gjenerojnë energji elektrike kanë qenë në treg prej disa vitesh, një prej ankesave më të përsëritura ishte kapaciteti i tyre i kufizuar për të prodhuar energji elektrike, krahasuar me panelet diellore tradicionale.

Zbulimi i ri nga ekipi në EPFL së shpejti mund të ndihmojë në kapërcimin e kësaj pengese. Falë një modeli të ri molekular, ata kanë rritur efikasitetin e konvertimit të energjisë së DSC-ve, thënë ndryshe, përqindjen e energjisë diellore që reflekton mbi to dhe që shndërrohet me sukses në energji elektrike të përdorshme. Efikasiteti ka tejkaluar nivelin 15% për rrezet e drejtpërdrejta të diellit dhe ka arritur deri në 30% në kushtet e ndriçimit ambiental.

Për referencë, panelet diellore që tregtohen aktualisht kanë efikasitet mesatar prej rreth 20%. DSC-të e gjeneratës së re kanë treguar gjithashtu “stabilitet operacional afatgjatë” prej të paktën 500 orësh./Media Ndërtimi

Continue Reading

Aktuale

Anketa e ASK, rreth 10 përqind e numrit të përgjithshëm të të punësuarve punojnë në sektorin e ndërtimtarisë

Published

on

Agjencia e Statistikave të Kosovës (ASK) ka publikuar rezultatet e Anketës Strukturore të Ndërmarrjeve (ASN) për vitin referues 2021.

Ky publikim me të dhënat që ofron, synon të paraqesë disa nga treguesit ekonomikë sipas strukturës së veprimtarive ekonomike.

“Sa i përket sektorëve ekonomikë, numri më i madh i ndërmarrjeve i takon tregtisë me 17,554 ndërmarrje, ose shprehur në përqindje (38.6%); shërbimet biznesore dhe shërbimet e tjera me 10,302 ndërmarrje (22.7%); industria përpunuese (prodhimi) me 5,832 ndërmarrje (12.8%); akomodimi dhe aktivitetet e shërbimeve me ushqim me 4,370 ndërmarrje (9.6%); ndërtimtaria me 3,838 ndërmarrje (8.4%); informacioni dhe komunikimi me 1 576 ndërmarrje (3.5%); transporti dhe magazinimi 1,611 ndërmarrje (3.5%); xehetaria dhe gurëthyesit me 170 ndërmarrje (0.4%); furnizimi me ujë, kanalizim, menaxhim mbeturinash dhe aktivitete revitalizimi të tokës me nga 152 ndërmarrje (0.3%); si dhe furnizim me energji elektrike, gaz avull dhe ajër të kondicionuar me 63 ndërmarrje (0.1%)”, thuhet në njoftim

Ndërsa, sa i përket punësimit për sektorët ekonomikë, të cilat ishin pjesë e hulumtimit, del që numri total i të punësuarve arrin shifrën 23,329, prej të cilëve sektori i tregtisë përbën rreth 79,620 të punësuar, ose shprehur në përqindje (34.1%); industria përpunuese (prodhimi) me 39,718 të punësuar (17.0%); shërbimet biznesore me 30,238 të punësuar (13.0%); ndërtimtaria me 25,498 të punësuar (10.9%); akomodimi dhe aktivitetet e shërbimeve me ushqim me 21, 266 të punësuar (9.1%); informacioni dhe komunikimi me 13,979 të punësuar (6.0%); si dhe sektorët tjerë kanë më pak se 5% të punësuar.

“Karakteristikë tjetër, që vlen të përmendet, është edhe qarkullimi i realizuar nga ndërmarrjet, ku dominon tregtia me një pjesëmarrje prej 53.3%; industria përpunuese (prodhimi) me 13.2%; ndërtimtaria me 9.9%; furnizimi me energji elektrike, gaz avull dhe ajër të kondicionuar me 7.3%; aktivitetet e shërbimeve të tjera me 6.1%; kurse sektorët e tjerë të veprimtarive ekonomike rezultojnë me një përqindje më të vogël të qarkullimit”, thuhet në njoftim.

Sa i përket treguesit të pagës mesatare mujore bruto, ajo sillet rreth 411 Euro në aktivitetet e përfshira në anketë./Media Ndërtimi

Continue Reading

Trending