Oda e Afarizmit të Kosovës dështon t’i mbledh ndërtuesit [video]

0

 

Megjithëse ishin ftuar afro 50 përfaqësues të kompanive ndërtuese dhe projektuese, në ambientet e Odës së Afarizmit të Kosovës (OAK) nuk ishin as dhjetë kompani. Arsye për këtë, Qemajl Pozhegu nga Pozhegu Brothers e sheh humbjen e besimit.

“Kjo ka ndodhur pasi ka humbur edhe besimi, që secili ndërtimtar t’i zgjedhin përmes atij institucioni kredibil. Shumica e odave në Kosovë kanë problemin e politizimit dhe probleme tjera që përfshihen me politikë dhe interesa të ndryshme të ndërthurura mes vete dhe kanë parë se ka një zhgënjim”, ka thënë Pozhegu, raporton Ndertimi.info.

Kurse kryetari i OAK-ut, Ismet Mulaj tha se shumë nga ndërtuesit janë të angazhuar.

“Është e vështirë të bëhen bashkë ndërtuesit në Kosovë, për shkak edhe të kohës së verës dhe angazhimeve, por përpjekja jonë është e vazhdueshme dhe në interes të ndërtueseve”, ka thënë Mulaj.

Brenda takimit u fol për problemet e këtij sektori, prej të cilave Pozhegu veçoi.

“Problemet janë të ndryshme, vonesat sa i përket në procedurën e marrjes së lejës. Urbanizmi kërkon procedura tjera që ndërlidhen me ta dhe ato procedura, p.sh. shpronësimi i tokës, ku jepet për interes publik, e që zgjasin me muaj të tërë”, shtoi pronari i “Pozhegu Brothers”.

E Mulaj tha se pas një muaji do të dalin me një dokument koncept ku do t’i adresohen Qeverisë së Kosovës me kërkesat ekzakte për përmirësimin e sektorit të ndërtimit. Por, sa do t’ia marrin parasysh institucionet këtë dokument, ai tha.

“Unë mendoj se shteti do të ketë vesh ta dëgjojë zërin e ndërtuesve. Ndërtimi është interes strategjik i shtetit, pasi që krijon shumë vende të reja të punës dhe zgjidh problemin e banimit dhe problemin e ndërtimit në Kosovë”.

PËRGJIGJU

Please enter your comment!
Please enter your name here