Për ndërtimin e rrugës Vojnik -Osojan, Llot 1, me gjatësi 3.6km me gjerësi 6m, që ishte paraparë të lidh fshatrat e komunës së Skenderajt me ato të komunës së Istogut, punimet kishin filluar në fund të janarit të vitit 2016 por nuk kanë përfunduar ende, edhe pse me planin dinamik ndërtimi i saj ishte paraparë të kryhet për 155 ditë. Në këtë segment të rrugës punimet kishin vazhduar deri në qershor të vitit 2017 kur edhe ishin ndërprerë pa afat.
Gjatë inspektimit fizik të rrugës kemi konstatuar se punimet ishin zhvilluar vetëm përgjatë 2.4km të rrugës, (ishin kryer gërmimet e dheut dhe shtruar baza e rrugës me zhavorr), një pjesë e së cilës ishte mbuluar nga shembja e dheut nga skarpatet. Në pjesën e mbetur të rrugës prej 1.2 km, MI-ja kishte kryer vetëm gërmimin e dheut.
Shkak që kjo rrugë të realizohet vetëm pjesërisht ishin problemet pronësore meqë kjo rrugë ishte rrugë tërësisht e re dhe ishte paraparë që e gjithë traseja të kalonte nëpër prona private, të cilat nuk ishin shpronësuar para nënshkrimit të kontratës. Investimi i bërë në këto pesë vite në këtë rrugë s’kishte ndonjë vlerë për qytetarët e komunave përfituese meqë rruga nuk ishte kompletuar, asnjë pjesë e saj nuk ishte në dispozicion për përdorim.
Edhe pse kontrata ishte nënshkruar në vitin 2016 rruga nuk është as afër përfundimit të ndërtimit dhe qytetarët nuk mund ta shfrytëzojnë atë as pas pesë viteve nga fillimi i punimeve. Koha e paraparë për ndërtimin e segmentit tjetër të rrugës Vojnik-Osojan – Llot 2 me gjatësi 6.5 km dhe gjerësi 6m, ishte 155 ditë pune, ndërsa në këtë rrugë ishin zhvilluar gjithsej 184 ditë efektive pune (përfshirë edhe ditët me shi) mirëpo as gjysma e rrugës nuk ishte ndërtuar, shkruan në raportin e Zyrës Kombëtare të Auditimit.
Punimet kishin filluar në prill të vitit 2016, por, MI-ja kishte hasur në pengesa nga pronarët e tokave nëpër të cilat ishte paraparë të ndërtohet rruga. Në ditën e tetë të punimeve banorët e kishin paralajmëruar OE-në se nuk do ta lejonin të zhvillonte punimet, megjithatë menaxheri i kontratës i caktuar nga ana e MI-së kishte urdhëruar zhvillimin e punëve pavarësisht se ishte njoftuar për këtë çështje.
Sipas tij, problemi ishte raportuar te mbikëqyrësit e tij, në takimet javore që rregullisht i mbante Drejtoria e Rrugëve e MI-së, mirëpo asnjë masë nuk ishte ndërmarrë për të zgjidhur problemin e pronësisë.
Pas inspektimit fizik të rrugës kemi konstatuar se vetëm rreth 3.5 km, apo afërsisht gjysma e rrugës, ishte ndërtuar/asfaltuar, pjesa tjetër kishte mbetur e pakryer. Shkak për këtë gjendje ishte komunikimi jo-efektiv mes MI-së dhe komunave përfituese.
Komunat nuk kishin ndërmarrë asgjë për të kryer shpronësimin e trasesë së rrugës ndërsa MI nuk ishte siguruar se komunat e kanë kryer shpronësimin.
Kësisoj, MI-ja kishte dhënë kontratë për ndërtimin e kësaj rruge pa u plotësuar parakushtet.
Për pasojë MI-ja, përkatësisht komunat përfituese, nuk e kishin arritur objektivën e vet për ndërtimin e kësaj rruge që lidhte lokalitetet përkatëse të dy komunave./ Media Ndërtimi.