Memoriali i Reçakut zor se përfundon [video]

0

Për viktimat e gjenocidit serb në Reçak ka një memorial. Mirëpo, punët në Memorialin Përkujtimor të Reçakut nuk po ndalen. Vitin e kaluar atje u rregullua bazamenti i bustit të ish-ambasadorit të OSCE-së në Kosovë William Walker.

E sivjet përsëri ka punë në këtë bust. Adnan Elshani nga Agjencia për Menaxhimin e Komplekseve Memoriale ka shpjeguar punët që do të bëhen në bazament.

“Pjesa e dytë e bazamentit ka me u përfundu me elektriken, ka me u ndërtu një pjesë e parkingut dhe pjesa e parkingut poshtë. Parkingu lartë është edhe për të hendikepuar, bashkë me stazën që vjen rrotull dhe ofrohet ku ka mundësi me pasë qasje deri te shtatorja e Wlakerit. Pjesa tjetër është restaurimi i dëmtimeve”, tha Elshani.

Mirëpo atyre u kanë dalë disa gjëra jashtë kontrollit. Në këtë kompleks një gjë është planifikuar, por nuk ka qenë në para masë.

“Aktualisht e kemi një problem. Pjesa ku do të ndërtohet parkingu, nuk është paraparë në para masë kanalizimi atmosferikë dhe i ujërave të zeza, e në projekt është. Do ta shohim mënyrën se si do ta ekzekutojmë”, shtoi ai.

E punët aq të mëdha janë sa që ende duhet vazhduar me tenderë për ta përfunduar projektin në tërësi.

“Është edhe një sy i kaltër aty me fontanë, më pas ka me u bë restaurimi dhe konservimi i shtëpive ku ka ndodhur masakra”, potencoi Elshani.

Kjo agjenci ka marrë vërejtje nga Zyra e Auditorit të Përgjithshëm të Kosovës në lidhje me një paradhënie që i ka dhënë kompanisë e cila ka punuar në bazamentin e bustit të William Walkerit. Por kjo del të ketë qenë një gabim teknik, thotë Elshani.

“Ka qenë gabim teknik, se në periudhën e nëntorit në vend se 10% avans është dhënë 15%”, përfundoi Elshani.

Për këtë kompleks deri tash kanë shkuar mbi 200 mijë euro, që priten të rriten vitet e ardhshme

 

PËRGJIGJU

Please enter your comment!
Please enter your name here