Kulla 400 vjeçare, më e vjetra në Dukagjin

0

“Historinë e kësaj kulle e di e gjithë Gjakova. Por pse ka mbetur kështu pas dore, unë nuk e di”. Pronari i sotëm i kullës së vjetër në Rogovë të Hasit të Gjakovës, Nazmi Poga, këto fjali i thotë si shenjë e krenarisë për monumentin që ka trashëguar e në të njëjtën kohë edhe si shenjë e mllefit ndaj kujdesit shtetëror për këso lloj objekjtesh.

Ai nuk heziton ta cilësojë si 400-vjeçare kullën trekatëshe të familjes Poga, sado që kjo tingëllon paksa e pamundur. Thirret edhe në burime të shkruara për këtë. Vërtetësia e saj e bën këtë objekt të parin e llojit të tij, në Dukagjinin e mbushur me kulla monumenetale, shkruan sot “Koha Ditore”

“Kulla është e ndërtuar para xhamisë së fshatit, sepse dihet se në të kanë qëndruar punëtorët që e ndërtuan këtë xhami”, thotë Poga. E xhamia, sipas tij dhe disa autorëve, është para Xhamisë së Hadumit, bërthamës së qytetit të Gjakovës.

Objekti i veçuar i shekullit XVI

Një trajtim të veçantë kullës i bëri studiesi Fejaz Drançolli, në librin e tij “Kulla shqiptare”. Objektin e përshkruan si ndërtim të shekullit XVI.

“Në territorin e Kosovës ka mbetur një kullë e veçuar nga fundi i shekullit XVI. Ky objekt banimi është rast unik dhe i veçantë që ka mbetur deri në ditët e sotme”, shkruan Drançolli, për kullën në Rogovë të Hasit, të cilën vendësit e njohin si Kulla e Ymer Pogë Latifit