Connect with us

Infrastrukturë

Kryetari Hyseni denoncon dallaveret me shpronësimet e tokave për ndërtimin e QKMF-së në Gjilan

Published

on

Kryetari i Komunës së Gjilanit, Alban Hyseni ka denoncuar 3  raste të keqpërdorimit dhe keq menaxhimit të pasurisë publike. Në një konferencë për media ai tha se këto ‘dallavere’ do të adresohen në organet përgjegjëse të drejtësisë.

“Rasti i parë ka të bëjë me Qendrën Kryesore të Mjekësisë Familjare (QKMF). Ndërtimi i objektit të ri të QKMF-së është edhe nisma e keqpërdorimeve brenda këtij institucioni. Përveç fazës së ndërtimit, lidhjes së kontratave edhe kundërligjshëm edhe me përmbajtje që dëmtojnë buxhetin e komunës edhe ashtu të varfër, keqpërdorime janë bërë edhe në fazën e blerjes së inventarit dhe furnizimit të objektit të ri.”, deklaroi Hyseni.

Sipas një Raporti të Auditimit të Brendshëm, ku është bërë regjistrimi i inventarit, sipas Hysenit ka një diferencë mes faturave të paraqitura dhe gjendjes faktike.

“Më pas, për të verifikuar një konstatim të tillë, kam formuar një komision të tretë, i cili ka bërë regjistrimin dhe evidentimin e inventarit, për të nxjerrë një rezultat të tretë, të pavarur dhe përfundimtar, me qëllim që të krijohet një pasqyrë e qartë. Kjo për shkak se, Raporti i Auditimit të Brendshëm dhe ai i komisionit për regjistrimin e inventarit nga QKMF nuk janë përputhur. Ndërkohë që, Raporti i Auditimit të Brendshëm dhe i komisionit të tretë të formuar nga unë si Kryetar i Komunës, janë pothuajse 100% në përputhje, ashtu që është konstatuar një diferencë e madhe në mes të inventarit të faturuar dhe gjendjes faktike në QKMF sipas verifikimit të inventarit të komisionit të tretë.

Po ashtu, ka edhe fatura fiktive në vlerë prej dhjetëra mijëra eurove, pagesën e të cilave e kemi ndaluar. E njëjta, figuron ende si obligim nga institucioni shëndetësor QKMF dhe duhet verifikim i saj.

Rasti i dytë: Është shkelje e keqpërdorim në vlera milionëshe. Kemi të bëjmë me shpronësimin e tokave nga komuna e Gjilanit dhe organi shpronësues, që në këtë rast është Kryetari i Komunës. Nga 26 milionë euro që është vlera totale e borxheve të trashëguara, vetëm në shpronësim, i kemi gjithsej 11 milionë euro. Ndërkohë që kjo vlerë, çdo ditë është në rritje sepse kemi raste që po paraqiten tek ne edhe tani.”, tha kryetari i Gjilanit.

“Në rastin e parë të shpronësimit, kemi të bëjmë me shpronësimin e gjithsej 27 ari e 66 metrash.

Sipas vlerësimit në ueb faqen zyrtare të Ministrisë së Financave, vlera e tokës në po këtë zonë është 120 euro për metër katrorë. Ndërkohë që, shpronësimi i këtyre tokave, nga komuna e Gjilanit është realizuar në vlerën prej 330 dhe 325 euro (bëhet fjalë për dy parcela të ndara që janë në kufinjë kadastral me njëra tjetrën).

Kontratat e shitblerjes së tokave, në po këtë zonë, me të njëjtin koeficient të ndërtimit, në po të njëjtat vite, janë nga 120 deri në 190 euro për metër katror.

Vlera totale e shpronësimit, për 27 ari e 66 metër, komunës se Gjilanit i kanë kushtuar plot 902,910 euro.

Kjo është një nga shumë lëndët e shpronësimit, por që për fat të mirë, ende nuk ka kaluar afati ligjor për pagesë, ndërsa jemi në fazën finale, kur lënda mund të dërgohet dhe të ekzekutohet edhe përmes përmbaruesit privat.

Në rastin e dytë të shpronësimit, kemi të bëjmë me shpronësimin e gjithsej 30 ari e 57 metër.

Sipas vlerësimit në ueb faqen zyrtare te Ministrisë së Financave, vlera e tokës në po këtë zonë është 200 euro për metër katror. Ndërkohë që, shpronësimi i këtyre tokave, nga komuna e Gjilanit është realizuar në vlerën prej 520 euro për metër katror.

Vlera totale e shpronësimit, për 30 ari e 57 metër, komunës së Gjilanit i kanë kushtuar plot 1,589,640 euro.

Këtë shumë, ne si komunë dhe qeverisje e re, jemi detyruar qe ta paguajmë si rezultat i ndjekjes së procedurave ligjore nga përmbaruesi privat. Vlera që jemi detyruar ta paguajmë për shpenzimet përmbarimore është 22,709.90 euro.

Edhe pse në vite e periudha të ndryshme, në dy rastet e lartpërmendura të shpronësimit, ekspertët për vlerësim të tokave për shpronësim ishin të njëjtit. Kjo mund të verifikohet lehtë përmes numrit identifikues të licencave të ekspertëve të shpronësimeve, në Raportet Përfundimtare të vlerësimit të tokave.

Në 11 muajt e parë të qeverisjes, pra në vitin 2022, ne si udhëheqje e re e komunës së Gjilanit, kemi paguar obligime të trashëguara nga ish qeverisja, në vlerë prej 6,676,566.19 euro. Nga e gjithë kjo shumë e paguar për borxhet, në vlerë prej afro 1 milionë euro kemi paguar vetëm shpenzimet përcjellëse për borxhet e trashëguara.

Më lejoni që tani, të paraqes edhe shkeljen e fundit, dhe më të rënden për nga vlera.

Në vitet 2017, 2019, 2020 dhe 2021 vlera totale e vendimeve për shpronësim është 11,838,296.50 euro, ndërsa planifikimi nga qeverisja e asaj kohe, për shpronësim, ka qenë vetëm 3,998,673.57 euro. Pra, diferenca mes vendimeve për shpronësim dhe planifikimit buxhetor për shpronësim është 7,238,472.08 euro.

Vitet    Planifikimi           Shpronësimi        Ndryshimi

2017    500,000.00 €       6,062,151.00 €     5,562,151.00 €

2019    900,000.00 €       2,968,977.00 €     2,068,977.00 €

2020    1,177,250.42 €    784,594.50 €        392,655.92 €

2021    1,421,423.15 €    2,022,574.00 €     601,150.85 €

Totali   3,998,673.57 €    11,838,296.50 €    7,238,472.0 €

Kodi penal i Republikës së Kosovës, në nenin 414 parasheh veprën penale Keqpërdorim i pozitës apo autoritetit zyrtar. Ndërsa, ligji për shpronësim të pronës së paluajtshme, një nga kriteret për shpronësim e parasheh edhe planifikimin për shpronësimin ose zotimin se do të planifikohen mjetet në të ardhmen. Në këtë rast, asnjë nga këto dy kritere mes kritereve të tjera nuk janë evidente.

Pra, konstatojmë se në ketë rast, kemi të bëjmë me keqpërdorim të detyrës zyrtare nga autoriteti iniciues i shpronësimit. Autoritet për inicim të shpronësimit në nivel lokal është Kryetari i Komunës. I njëjti, me paramendim, ka dëmtuar buxhetin e komunës se Gjilanit në vlera milionëshe dhe ka shkaktuar edhe shpenzime të tjera shtesë po ashtu në vlera milionëshe. Ndërsa, edhe pas 1 viti qeverisje të ndershme e të përgjegjshme, me gjithë borxhet e paguara, jemi larg qe të dalim nga kriza buxhetore e shkaktuar nga qeverisja e kaluar, e papërgjegjshme, e padrejtë, e padenjë dhe pa planifikim të mirëfilltë.”, deklaroi kryetari i Komunës së Gjilanit, Alban Hyseni./Media Ndërtimi.

Infrastrukturë

Kurti: Autostrada Prishtinë-Gjilan po shkon drejt përfundimit, mbi 75% të punimeve deri në fshatin Bresalc janë finalizuar

Published

on

Kryeministri i vendit, Albin Kurti po vazhdon të tregojë disa nga të arriturat e shënuar gjatë qeverisjes së tij.

Kurti ka publikuar disa të dhëna mbi punimet që kanë kryer e që lidhen me infrastrukturë.

Ai ka treguar se si Kosova dhe Shqipëria po lidhen edhe më shumë mes vete përmes hekurudhave dhe rrugëve.

“Kemi arritur në fazën e përgatitjes së projektit ideor për ndërtimin e linjës hekurudhore Prishtinë-Durrës, që na lidhë edhe më shumë me Republikën e Shqipërisë dhe që i forcon edhe më tej ekonomitë tona. Po ndërtojmë rrugë që ndërlidhin fshatra të Kosovës me Shqipërinë për më shumë shkëmbime e më shumë turizëm malor”.

Gjithashtu Kurti ka treguar se Kosova po lidhet edhe me Malin e Zi.

“Nga ana jonë si palë kemi bërë krejt çka duhet për rrugët që lidhin Pejën me Rozhajën, dhe Deçanin me Plavë, për të cilat kemi marrëveshje bashkëpunimi me Malin e Zi. Për ekonomi të shëndoshë e zhvillim të qëndrueshëm, infrastruktura është element kyç. Jo vetëm në ndërlidhjen më të shpejtë e të afërt ndërmjet qyteteve së brendshmi, por edhe në lehtësimin e qasjes në rrugë e bashkëpunim rajonal”.

Tutje, kryeministri ka shkruar se nuk ka qenë e lehtë punimi i disa rrugëve që sipas tij, ishin lënë keq nga qeveritë e mëhershme.

“Po, do t’i përfundojmë punët që qeveritë e mëhershme i lanë keq e në gjysmë, si rruga Prishtinë-Podujevë, Prishtinë-Mitrovicë, autostrada Prishtinë-Gjilan dhe rruga Prishtinë-Pejë. Nuk ka qenë e lehtë të zhbëjmë labirintin burokratik, keqplanifikimet me projekte dhe keqmenaxhimet me kontrata, por po ia dalim.

Kanë filluar punimet me hov të merituar në rrugën Prishtinë-Mitrovicë. Puna në segmentin e parë të kësaj rrugë kishte nisur në vitin 2009, para 15 vjetëve. Nga një rrugë e cila ishte me dy korsi, po e kthejmë atë në rrugë nacionale me dy drejtime, me gjithsej katër korsi”, theksoi ai.

Kurti tutje ka pohuar se “puna po vazhdon edhe në rrugën Prishtinë-Podujevë, e cila ka filluar të ndërtohet në vitin 2016, para 8 vjetëve. Atë po e zgjerojmë dhe po ia shtrojmë të shumëpriturat 15 kilometrat e mbetur në segmentin Prishtinë-Lluzhan, për çka kemi ndarë 35 milionë euro”.

“Autostrada Prishtinë-Gjilan po shkon drejt përfundimit. Mbi 75% të punimeve deri në fshatin Bresalc janë finalizuar. Është ndarë buxheti për vazhdimin e saj deri te Dheu i Bardhë. Jemi të vetëdijshëm për vonesat, por edhe jemi të vendosur që puna të ecë e të përfundojë me cilësinë e duhur dhe sa më parë. Ndërkaq tash së fundmi janë nënshkruar kontratat për fillimin e ndërtimit të rrugës me katër korsi Prishtinë-Pejë, segmenti Kijevë-Dollc, me një gjatësi 12.8 km, në vlerë prej 21 milionë euro. E kemi ndarë buxhetin për të vazhduar pastaj me segmentin nga Dollci e deri në Zahaq”.

Më tej ai ka shkruar ”kemi filluar procedurën e prokurimit për ndërtimin e rrugës nga dalja jug e autostradës në Prizren e deri në hyrje të tunelit të rrugës Prizren–Tetovë si dhe ndërtimin e rrugës nga fshati Kërstec në komunën e Sharrit e deri në fshatin Zapod të Bashkisë së Kukësit. Jemi afër përfundimit të urës në Drelaj dhe janë nënshkruar kontratat për ndërtimin e urave në Badoc e Rogovë të Hasit”.

“Ndërtuam e asfaltuam rrugë edhe në zona e fshatra në veri të Republikës me të cilat lidhëm fshatrat mes vete si dhe me komuna në jug. Atje po ashtu për herë të parë po ndërtojmë e rinovojmë dhjetëra shtëpi të banorëve shqiptarë që janë dëmtuar nga lufta e fundit në Kosovë. E pas 24 vjetëve në Mitrovicë të Veriut, Zveçan, Zubin Potok dhe Leposaviq hapëm e funksionalizuam Zyrat Kadastrale Komunale.

Të gjitha këto janë bërë, ndërkohë që borxhin për shpronësime e kemi ulur për 86 milionë euro”, shton kryeministri.

Kryeministri ka pohuar se shtrimi i rrugëve është i rëndësishëm aq sa mirëmbajtja e tyre.

“Më herët mirëmbajtja e rrugëve ka kushtuar 57 milionë euro për tri vjet. Tani, me kontratat që kemi nënshkruar ne, me paramasa të ndryshuara, duke shtuar pozicione që e rrisin kualitetin e sanimeve siç janë rrjetat geogrid në shtresa të asfaltit dhe duke hequr pozicionet fiktive dhe ato të duplifikuara, e kemi zbritur atë në 38 milionë euro”.

“Përveç këtyre projekteve kemi trasuar udhën edhe për projekte të mëdha të Qeverisë sonë. Kemi nënshkruar marrëveshje me Maqedoninë e Veriut për rrugën Prizren-Tetovë, që do të kalojë mes për mes malit të Vërtopit.

Kemi paraparë 200 milionë euro investime për rehabilitimin e Linjës Hekurudhore 10, që do të mundësojë operimin e trenave me shpejtësi deri në 100km/orë në shumicën e seksioneve të linjës. Po punohet për rehabilitimin e linjave hekurudhore Fushë Kosovë-Klinë-Pejë me gjatësi 81 km, dhe linjës Klinë-Prizren, me gjatësi prej 58 km. Ne e kemi filluar punën tonë para tri viteve, me bindjen se kur ka vullnet të mirë, zgjidhja e drejtë është veçse një hap i guximshëm larg”.

Continue Reading

Infrastrukturë

Mospajtime në Beograd për objektin e bombarduar nga NATO, s’duan ta rindërtoj dhëndri i Donald Trumpit

Published

on

Serbët në Beograd dhe përkujtuesit e luftërave ballanike në vitet ’90, po i përgjigjen me ftohtësi fjalës së zyrtarët serbë janë befas në bisedime të avancuara me dhëndrin e Donald Trumpit, Jared Kushner, për ta rindërtuar njërin prej simboleve më të njohura të bombardimeve të Perëndimit mbi caqet serbe.

Ndërtesa e braktisur e Shtabit të Përgjithshëm të ushtrisë jugosllave në qendër të Beogradit ishte goditur nga dy bombardime në prill dhe në maj 1999, gjatë 78 ditëve të bombardimit të Jugosllavisë nga NATO-ja për t’i dhënë fund dhunës dhe spastrimit etnik në Kosovë.

Megjithëse ka pasur debate sporadike në dekadat e fundit për transformimin e kësaj zone, ndërtesat e ish-Shtabit të Përgjithshëm kanë mbetur kryesisht të pandryshuara si përkujtim për shumë serbë për paragjykimet e perceptuara kundër kauzës së tyre kombëtare në një udhëkryq të errët historik.

“Pse duhet të falet?” tha Zhivko Nedeljkoviq për Radion Evropa e Lirë (REL) javën e kaluar, pas lajmit për marrëveshjen e mundshme me Kushnerin.

Ndërtesat e Shtabit të Përgjithshëm dhe ndërtesat ngjitur të Ministrisë së Mbrojtjes janë në një listë për mbrojtjen e trashëgimisë, ndërsa tokat nën to i takojnë Qeverisë. Instituti i Beogradit për Mbrojtjen e Trashëgimisë Kulturore ka thënë se nuk e ka marrë asnjë dokument që propozon ndryshimin e këtij statusi.

Vuçiqi është zotuar për transparencë të plotë për çfarëdo plani për këtë zonë, por plani i autoriteteve serbe për projektin e ardhshëm me Kushnerin u bë i ditur vetëm pasi një deputet opozitar zbuloi pjesë të tij.

Kushner është i martuar me vajzën e Trumpit, Ivanka, dhe është përqendruar në projekte zhvillimore dhe investuese prej se Trumpi i humbi zgjedhjet presidenciale më 2020, përfshirë përmes kompanisë të quajtur Affinity Partners. Trumpi pritet të garojë kundër presidentit demokrat, Joe Biden, në zgjedhjet e nëntorit.

Gazeta amerikane sugjeroi se marrëveshja për 1.500 banesa luksoze dhe një hotel në qendër të Beogradit përfshin një investim 500 milionë dollarë dhe një qira 99-vjeçare “pa pagesë”, me shtetin serb që do t’i merrte 22 për qind të fitimeve.

Javën e kaluar, New York Times e citoi Grenellin të ketë thënë se projekti i Kushnerit është mundësi për “ta shndërruar një simbol të konfliktit të kaluar në një urë miqësie dhe rindërtimi”.

Gruia Badescu, hulumtues i historisë së Evropës Lindore në Universitetin Konstanz, me fokus në rrënimet, rindërtimet dhe kujtesën e luftërave të viteve ’90 në Ballkan, ka hulumtuar thellësisht për ndarjet përreth ish-ndërtesës së Shtabit të Përgjithshëm./Media Ndërtimi

Continue Reading

Infrastrukturë

Një kullë 23 katëshe do të ndërtohet pas Teatrit Kombëtar në Tiranë

Published

on

Pasi dështuan të realizojnë ligjin special për ndërtimin e teatrit të ri kombëtar dhe kullave pas tij, sipërmarrësi Shkëlqim Fusha dhe qeveria shqiptare kanë hartuar një plan të ri.

Një kullë 23 katëshe do të ngrihet pas Teatrit Kombëtar, mbi një sipërfaqe publike prej 1,266 m2, të cilën Bashkia Tiranë e “dhuron” përmes një marrëveshje ku merr në këmbim sipërfaqe ndërtimi.

Citizens disponon projektin-idenë e kullës “Mixuse” prej 13 -24 katesh që do të ngrihet në shëtitoren “Abdi Toptani”.

“Nuk ka kulla aty. Nuk do ndërtohen kulla aty. Brenda, jashtë, mbrapa dhe në të gjithë perimetrin ku kanë bërë zvarritjen imagjinare të viktimës nuk ka kulla”, – deklaronte kryeministri Edi Rama, në kohën e protestave të artistëve kundër shembjes së Teatrit Kombëtar.

Me një vendim të datës 3 Maj të vitit të kaluar, Bashkia Tiranë i ka dhënë kompanisë “Fusha shpk” 1266.6 m2 truall në rrugën “Abdi Toptani”, dhe dy ndërtesa përkatësisht 801.4 m2 dhe 183 m2. Njëra prej tyre është godina e ndërmarrjes së dekorit të Tiranës.

Kompania “Fusha” ishte ofruar që në vitin 2018 për ndërtimin falas të Teatrit Kombëtar në këmbim të një sipërfaqeje prej mijëra metra katrorë ku do të ngrinte edhe një kompleks prej 6 kullash. Aktualisht, Teatri me nje kosto prej 40 mln euro po ndërtohet nga fondet publike, megjithatë sipërmarrësi po e realizon ambicien për të ndërtuar mbi tokë publike në zemër të kryeqytetit.

“Në këmbim të përfitimit të 50 % të sipërfaqes ndërtimore (nëntokë dhe mbi tokë), që do të ngrihet në pasurinë e llojit truall në pronësi të Bashkisë së Tiranës”, thuhet në vendimin e Bashkisë Tiranë.

SON Engineering & Construction është kompania që ka projektuar ndërtimin e kullës, e cila ka shoqëri bijë “Shoqërinë Koncesionare Tirana 4”, që 32.9% të aksioneve zotërohen po nga kompania “Fusha’, ndërsa administrator është Elti Fusha, djali i Shkëlqim Fushës.

Citizens komunkoi me një përfaqësues të kompanisë Fusha, për një koment mbi këtë projekt, por ky i fundit nuk pranoi të citohet.

Kompania “Fusha” ka një histori të gjatë përpjekjesh për të ndërtuar Teatrin Kombëtar, e cila duket se po vuloset me dhurimin e këtij trualli.

Në korrik të 2021, Gjykata Kushtetuese rrëzoi vendimin e qeverisë për të kaluar në pronësi të Bashkisë Tiranë Teatrin Kombëtar, duke e konsideruar atë si të papajtueshëm me kushtetutën dhe me marrëveshjet ndërkombëtare.

Marrëveshja e miratuar nga Këshilli Bashkiak, duket se ka dalë mbi të gjitha institucionet, pasi po ekzekuton një vendim të cilin Parlamenti nuk arriti ta bënte duke qenë se u shpall antikushtetues.

Gjykata Kuashtetuese vlerësoi asokohe se ligji, i cili përcaktonte një procedurë të veçantë negocimi për lidhjen e kontratës për projektin urban dhe godinën e re të teatrit, “cënon lirinë e veprimtarisë ekonomike, parimin e shtetit të së drejtës dhe atë të decentralizimit dhe të autonomisë vendore”.

Antikushtetueshmeria e ligjit lidhej me faktin që shteti nuk mundet të falë tokë publike tek një privat.

Sot Bashkia Tiranë po zbaton me anë të një Vendimi të Këshillit Bashkiak parimin e këtij ligji duke falur tokë publike.

Në 16 shkurt 2018, sipërmarrësi Shkëlqim Fusha përmes një kërkesë dyfaqëshe synonte të transformonte pronën e tij prej vetëm 298.1 m2 në një kompleks kullash 17-21 kate, të shtrira mbi 8465 m2 tokë publike-përfshirë Teatrin Kombëtar, ish-selinë e Partisë Demokratike dhe Drejtorinë e Përgjithshme të Burgjeve. Ai propozonte ndërtimin e nje teatri të ri dhe një bllok ndërtesash komerciale në truallin ekazsitues të Teatrit Kombëtar.

Në 8 shkurt u vendos guri i parë për shembjen e Teatrit Kombëtar si dhe nisën dhe hapat e para të betejës 2 vjeçare të artistëve dhe aktivsitëve.

Në atë datë, artistët u njoftuan për lirimin e godinës dhe zhvendosjen e tyre te ArtTurbina.  Ata dyshuan se pas kërkesës për lirimin e godinës qëndronte plani për shembjen e saj.

Dhe pak ditë më vonë u shfaq plani i Shkëlqim Fushës për ndërtimin e kullave dhe teatrit të ri./Media Ndërtimi

Continue Reading

Trending