Komuna e Prishtinës i ka bartur në pronësi te, Ndërmarrja Publike Banesore SH.A. Prishtinë rreth 7 ari të pronës së Pasurisë Shoqërore (P.SH.) “Ujërat” ku sipas gjendjes kadastrale shtrihet shtrati i lumit Prishtina. (Prova 1: Skica ku gjendet parcela Ujërat me numër 7773-1 dhe këmbimi i një pjese të saj te NPB-ja, me vija horizontale të kuqe)
Vendimi është marr më 14.06.2021 nga Kuvendi i Komunës së Prishtinës, me propozim të kryetarit, Shpend Ahmeti, me qëllim të mundësimit të realizimit të projektit të dyshimtë 120 milionësh afaristo-banesor në Lakrishtë ndaj të cilit ka nisur hetim Policia e Kosovës pas pretendimeve të bazuara publike për një varg shkeljesh ligjore e procedurale.
“Miratohet propozimi i Kryetarit të Komunës për këmbimin e pronës së paluajtshme komunale, P.SH (Pasurisë Shoqërore) “Ujërat” Prishtinë, me pronën e paluajtshme në pronësi, PSH, BVI për Banim” thuhet në vendim. (Prova 2- Vendimi i Kuvendit Komunal)
Ndonëse vendimi i Kuvendit Komunal i referohet P.SH. “Ujërat” si pronë e paluajtshme komunale, një dokument i Drejtorisë komunale të Urbanizmit i datës 09.03.2021 “Vendim për caktimin e kushteve ndërtimore” thekson se kjo parcelë me numër 7773-1 gjendet në pronësi/posedim të Pasurisë Shoqërore “Ujërat”.
Prova 3- Vendimi i Drejtorisë së Urbanizmit
E Ministria e Mjedisit ka konfirmuar se parcela Pasuria Shoqërore (P.SH.) “Ujërat” në Lakrishtë nuk është nën administrimin e Komunës së Prishtinës, por të Ministrisë. Rrjedhimisht Komuna as nuk e posedon dhe as nuk mund t`ia jap në këmbim këtë pronë asnjë palë të tretë, në këtë rast NPB-së pa pëlqimin dhe miratimin e Ministrisë përkatësisht Qeverisë së Kosovës.
“Sa i takon administrimit me Pasurinë Shoqërore P.Sh. “Ujërat” është MMPHI-Qeveria”, thuhet në përgjigjen e Ministrisë.
Sipas zyrtarëve nga Ministria e Mjedisit, Planifikimit Hapësinor dhe Infrastrukturës Komuna e Prishtinës asnjëherë nuk ka kërkuar dhe nuk i është dhënë pëlqim për ridestinimin e kësaj parcele apo kalimin te një pronar tjetër në këtë rast te NPB-ja.
Sipas Ligjit Nr. 04/L-147 PËR UJËRAT E KOSOVËS, neni 13. 1 paragrafi 5, Ministria e Mjedisit është përgjegjëse për menaxhimin administrimin dhe menaxhimin e të gjitha resurseve ujore në territorin e Republikës së Kosovës.
Por, për dallim nga administrimi që është e drejtë ekskluzive e nivelit qendror, sipas legjislacionit në fuqi një pjesë e menaxhimit të pasurisë ujore publike i takon edhe komunave, për shfrytëzim dhe mirëmbajtje konform destinimit të përcaktuar të ujërave, por assesi dhënien në këmbim të kësaj pasurie, një pale të tretë pa vendim të Qeverisë.
Neni 13 “Menaxhimi i pasurisë ujore publike” i Udhëzimit Administrativ MMPH-Nr. 05/2016 Për Rregullimin e Statusit të Pasurisë Ujore, thekson:
- Menaxhimi i pasurisë ujore publike nënkupton shfrytëzimin, mirëmbajtjen dhe ruajtjen e kësaj pasurie në mënyrë që ajo të jetë në gjendje ti shërbejë destinimit të përcaktuar,
- Përgjegjësia për menaxhimin e pasurisë ujore publike të përfshirë në zonat urbane është e komunave përkatëse ndërkaq në zonën e pellgut lumor është Autoriteti i Rajonit të Pellgjeve Lumore (departament që vepron në kuadër të Ministrisë).
Për më tepër, udhëzimi administrativ neni 15 thekson se komuna për shfrytëzimin e pasurisë ujore publike qoftë edhe për çështje pushimi apo rekreacioni duhet të ketë pëlqim paraprak nga Autoriteti i rajonit të Pellgjeve Lumore që vepron në kuadër të ministrisë.
Komuna e Prishtinës përfshirë kryetarin Shpend Ahmeti dhe drejtoritë përkatëse nuk janë deklaruar fare lidhur me këmbimin e kësaj parcele dhe ndërrimin e pronarit.
Vendimi i Kuvendit Komunal të Prishtinës për këmbimin e kësaj prone ishte marr pas pëlqimit nga Drejtoria e Urbanizmit dhe Kadastrit bazuar në ndryshimet e bëra në terren të gjendjes kadastrale nga tekniku gjeodet me shkollë të mesme i kontraktuar nga NPB-ja, Haki Selmani, i cili kundërligjshëm e kishte kryer punën e gjeodetit të licensuar.
(Artikull i shkruar nga gazetari i mediumit publik, Arsim Halili.)/Media Ndërtimi.