Beqaj kërkon nga Maqedonia të nis ndërtimin e autostradës që lidhet me Kosovën

0

Ministri i Ministrisë së Inovacionit dhe Ndërmarrësisë Besim Beqaj gjatë një vizite zyrtare në Shkup është takuar me Ministrin e Ekonomisë së Maqedonisë Kreshnik Bekteshi, këtij të fundit i ka kërkuar që të ndërmerren hapa për ndërtimin e autostradës që lidh të dyja këto vende.

Beqaj ka theksuar se pala kosovare po lëviz shpejt në drejtim të përfundimit të autostradës deri në kufi.

“Kosova është duke bërë një investim të madh që do t’i ndihmojë edhe Maqedonisë dhe shpresoj që edhe Maqedonia të ketë qartësi ekonomike dhe politikë që të përfundojë këtë rrugë sa më shpejtë, sepse nga momenti kur rruga ka shkuar në tjera drejtime, ka pasur efekte negative në këmbimet tona tregtare”, tha Ministri Beqaj.

Veç kësaj të dyja palët kanë bashkëbiseduar në lidhje me bashkëpunimin bilateral në fushën e zhvillimit ekonomik, të shkëmbimeve tregtare në mes të dy vendeve, mbledhjen e përbashkët të dy qeverive, si dhe për iniciativën për marrëveshje të bashkëpunimit në fushën e Inovacionit dhe ndërmarrësisë.

Ndërsa Ministri Bekteshi ka shprehu kënaqësinë e tij për pritjen e Ministrit Beqaj duke theksuar nevojën e thellimit të bashkëpunimit ekonomik në mes të dy vendeve.

“Kolegut Beqaj, i cili kryeson resorin e inovacionit dhe ndërmarrësisë, i prezantova masat e planit për rritje ekonomike të qeverisë sonë, e cila përcakton prioritetet kryesore të politikave për periudhën e ardhshme dhe që pritet të rrisin investimet private, krijimin e vendeve të punës, rritjen e efikasitetit, produktivitetit dhe konkurrencës së sektorit privat, rritjen e eksporteve dhe bashkëpunimit ekonomik rajonal, si dhe përmirësimin e mirëqenies së qytetarëve”, tha ministri Bekteshi pas takimit.

Të dy ministrat në takim kanë bashkëbiseduar edhe për mbledhjen e përbashkët të dy qeverive dhe për mundësinë inicimin të marrëveshjes në fushën e inovacionit dhe ndërmarrësisë.

Beqaj gjatë qëndrimit në Maqedoni është takuar edhe me drejtorin e Bankës Botërore për Maqedoni dhe Kosovë Marko Mantovanelli, me të cilin ka bashkëbiseduar në lidhje me mundësinë e përkrahjes nga Banka Botërore për Ministrinë e Inovacionit dhe Ndërmarrësisë.

Gjithashtu,Beqaj ka vizituar edhe Qendrën e Inovacionit në Shkup ku është njoftuar me punën e saj, me qëllim të marrjes së praktikave të mira të funksionimit, si dhe eksperiencën në ndarjen e fondeve. Prezantimin e punës së Qendrës së Inovacionit në Shkup, para ministrit  Beqaj e ka bërë drejtori i kësaj qendre Jovan Despotovski.

REKLAMA